उत्कृष्ट स्टार खेलाडीविरूद्ध सन्दीपले बलिङ गर्ने, दोस्रो पटक दिल्लीको प्लेईङ ११ मा

काठमाडौं । नेपाली राष्ट्रिय टोलीका स्पिनर सन्दीप लामिछाने लगातार दोस्रोपटक इन्डियन प्रिमियर लिग (आईपीएल) क्रिकेटमा मैदान उत्रने भएका छन् ।

दिल्ली डेयरडेभिल्समा रहेका लेग स्पिनर सन्दीप आईपीएल अन्तर्गत केहि बेरपछि हुने चेन्नई सुपर किंग्सविरुद्धको खेलमा मैदान उत्रने भएका छन् । चेन्नईविरुद्ध दिल्लीको टोलीमा सन्दीप प्लेईङ ११ मा परेका छन् ।

फिरोज शाह कोट्ला रंगशालामा नेपाली समय अनुसार राति ८ बजेर १५ मिनेटमा सुरु हुने खेलमा सन्दीप टोलीमा परेका हुन् । चेन्नई विरुद्ध दिल्लीले पहिले ब्याटिङ गर्नेछन् ।  चेन्नईले टस जितेर पहिले बलिङ रोजेको छ ।

सन्दीपले गत शनिबार रोयल्स च्यालेन्जर्स बैंग्लोरविरुद्ध डेब्यु गरेका थिए । आज हुने खेलमा सन्दीप क्रिकेटका स्टार खेलाडी विरुद्ध बलिङ गर्नेछन् । भारतका पूर्वकप्तान तथा चेन्नाईका कप्तान महेन्द्रसिंह धोनी, सेन वाट्सन, सुरेश रैना, ड्वेन ब्राभो, अम्बती रयुडु, फाफ् डु प्लेसिस् लगायतका विश्व चर्चित खेलाडीविरुद्ध खेल्नेछन् ।

आफ्नो डेब्यु खेलमा नै सन्दीपले उत्कृष्ट बलिङ गरेका थिए । उनले ४ ओभर बलिङ गरेर २५ रन खर्चेर १ विकेट लिएका थिए ।